रिमझिम बरसय बादर

जोहार भाई मन ला.....!

सावन भादो म एक ठन गीत भेजत हवं

अनंद लव अउ अपन बिचार देहव.....!!

.............................. समीर..

.................. रिमझिम बरसय बादर ........

रिमझिम बरसय बादर अउ डोले पवन !

बिजली रहि-रहि बारय तन म अगन !!

सरग बैरी गजब घमघमाथे

पापी मन म डर ये समाथे !

चुचवावय ओरिया जईसे दुनो नयन

बिजली रहि-रहि बारय तन म ये अगन

माते मजूर बन मा नाचय

मेचका बिरहा पुरान बांचय !

नदियाँ कस बाढे मोर जीव के जरन

बिजली रहि-रहि बारय तन म ये अगन

सावन हरेली भादो पोरा

धरके लाये हें अपन कोरा !

मोर सुख बाढे बिटिया जैसे गय गवन

बिजली रहि-रहि बारय तन म ये अगन

खेत-खार मा गुन्जय ददरिया

गावंय जुरमिल जमो जवारिहाँ

पिया बिना लागय मोला बही बरन

बिजली रहि-रहि बारय तन म ये अगन

घर घर गौरा भोजली गावंय

देबी देवता गजब रिझांवय !

मन के मिलौना बिन में का करंव अपन

बिजली रहि-रहि बारय तन म ये अगन

जब ले चौमास सुघर आइस

सबके हिरदे निचट जुदाइस !

मोर जीव के जियान काउन करय हरन

बिजली रहि-रहि बारय तन म ये अगन !!

रिमझिम बरसय बादर अउ डोले पवन !

बिजली रहि-रहि बारय तन म अगन !!

......................रचयिता..

........सुकवि बुधराम यादव..

............. बिलासपुर..

....................... परिचय...............

......................बुधराम यादव ............

पिता का नाम - श्री भोंदू राम यादव

पत्नी - श्रीमती कमला देवी यादव

जन्मतिथि - 3 मई 1946

पता - ग्राम खैरवार (खुर्द) तहसील-लोरमी, जिला-बिलासपुर, छत्तीसगढ़.

शैक्षणिक योग्यता - सिविल इंजीनियरिंग में पत्रोपाधि अभियंता

साहित्यिक अभिरुचि - गीत एवम कविता लेखन छत्‍तीसगढी एवम हिंदी में, सतसाहित्य अध्ययन चिंतन और गायन

कृतियाँ - काव्य संग्रह " अंचरा के मया " छत्‍तीसगढी गीत एवम कविता संग्रह प्रकाशित

प्रकाशन एवम प्रसारण - वर्ष 1966-67 से प्रयास प्रकाशन बिलासपुर से प्रकाशित काव्य संग्रह 'खौलता खून', मैं भारत हूँ, नए गीत थिरकते बोल, सुघ्घर गीत एवम भोजली आदि में रचनाएँ प्रकाशित हुई . इनके अतिरिक्त अन्य आंचलिक पत्र पत्रिकाओ एवम काव्य संग्रहों में भी रचनाओं का प्रकाशन होता रहा है. आकाशवाणी तथा गोष्ठी एवम कवि सम्मेलनों के माध्यम से भी निरंतर साहित्य साधना करते रहें हैं.

सम्प्रति - अभियंता के पद पर विभिन्न स्थानों में शासकीय सेवा करते हुए साहित्य साधना में सक्रिय रहे, वर्तमान में पद से सेवानिवृत होकर बिलासपुर में सक्रिय.

वर्तमान पता - एम.आई.जी. ए/8 चंदेला नगर रिंग रोड क्र. २ बिलासपुर, छत्तीसगढ़